CONCELLO DO BARCO DE VALDEORRAS
--
Que Visitar
O Mosteiro de Xagoaza
O visitante pode gozar, a poucos minutos do centro do Barco, dun lugar silencioso, recollido e con moito encanto. A cruz de Malta esculpida sobre a porta principal da igrexa de San Miguel (Século XII), recorda que foi lugar administrado pola Orde de San Xoán de Xerusalén. A porta sur e a ábsida semicircular, con fiestra xeminada e canzorros historiados, deixan constancia da orixe románica.
O Mosteiro é unha sobria construción do Século XVIII, convertida en moderna adega para a elaboración de viños de godello. Nas súas proximidades hai unha casa restaurada, cunha adega-cova escavada na rocha. Seguindo o río augas arriba chegaremos a un lugar cheo de maxia: unha rústica ponte dun arco ao pé das ruínas dunha acea, entre a mesta vexetación e o son das augas do río Mariñán.
A Vila do Castro
Ofrece unha ampla vista sobre a chaira na que se asenta O Barco. Destacan os restos da súa fortaleza, que pertenceu ao longo do tempo ás familias dos Castro, Pimentel e Sarmiento. Estes últimos eran os condes de Ribadavia e derradeiros señores da xurisdición de Valdeorras.
Tamén chama a atención a igrexa parroquial, a casa Carballo, con solainas entre arcos a dous niveis, e principalmente o pazo de Flórez. Data de 1630 e ten unha orixinal fachada con seis arcos de pedra vermella do país sobre o amplo soportal. Arestora está acondicionado como aloxamento turístico, conservando amoblamento, decoración e obras de arte orixinais. Tamén dispón, nunha palleira anexa, dun pequeno e curioso conxunto de carruaxes e aparellos de montar.
O Barco Vello ten o río e o antigo camiño real como referentes. A praza Maior, de forma triangular e aberta ao Sil, é o centro simbólico da Vila. Nela destaca a casa vermella do Casino (1910) con reminiscencias modernistas. Conflúe a praza no seu vértice coa igrexa parroquial de San Mauro (1927), onde comeza a rúa Escura ou de San Mauro, que baixa ao Porto da Barca, antigo embarcadoiro da lancha que unía O Barco con Viloira ata finais do século XIX.
A denominación Barco de Viloira é oficial ata 1660. A rúa Real ten casas de señorío, dúas delas con escudo, e outras máis modestas, como as da rúa de San Roque, nas que se aprecia a tipoloxía da construción tradicional. Pasando a vía do tren está a Casa de Río Cigüeño (séc. XVII) que foi cuartel e centro de represión na guerra civil. Arestora está rehabilitada para a promoción dos recursos comarcais (para o seu uso por entidades benéficas e culturais)
Tamén no municipio do Barco podemos visitar a localidade de Éntoma que ten unha ponte antiga sobre o río Galir, nunha das vías secundarias trazadas polos romanos. Recentemente restaurada, é parte do Camiño de Inverno a Santiago. Tamén nesta ruta xacobea, na poboación de A Proba hai unha pequena igrexa con sinais da arte románica no seu exterior.
O Camiño de Inverno entra no municipio do Barco precisamente por Entoma, y segue logo o seu percorrido polo centro urbano. Hai un pequeno albergue na localidade de Xagoaza.
Viloira, na marxe esquerda do Sil, conta cunha fermosa praza e coa Casa Grande (1637), espléndido edificio señorial que acolle os servizos comarcais da Xunta de Galicia. No seu interior está en exposición permanente a colección municipal Valdearte de arte contemporánear.
RUTAS TURÍSTICAS
Pincha en cada enlace para coñecer as rutas que se poden facer no concello:
ARREDORES DA COMARCA
Marcando os lindes da comarca coas Terras de Trives está a ponte do Bibei, fermosa obra romana que resiste o paso do tempo. Alí mesmo un par de miliarios sinalan o paso da Vía XVIII. Tamén a ponte da Cigarrosa, entre A Rúa e Petín, ten alicerces romanos, aínda que a súa espléndida feitura é medieval. Nunha casa pegada á igrexa de Santo Estevo da Rúa hai unha lápida dedicada a un patricio da etnia gigurri e, seguindo a N-120, en Montefurado os romanos fixeron unha apertura na montaña para desviar o río e extraer ouro das súas areas.
A Idade Media ten no castelo do Bolo un enclave sobranceiro. Vixía estratéxico que os reis lle cederon á nobreza, o castelo hoxe pode visitarse, e contén un pequeno museo sobre a vida no recinto amurallado e un miradoiro. Preto de alí hai que visitar o Santuario da Virxe das Ermidas, fastosa obra barroca levantada nun enclave de singular beleza.
Por último, saíndo do Barco pola antiga estrada de Ponferrada chegase á ponte de Sobradelo (Século XVII) que os guerrilleiros dinamitaron no seu arco central para conter o avance das tropas francesas en 1809. E pola mesma estrada, e a tan só 20 quilómetros do Barco, na veciña comarca do Bierzo, está a paraxe arqueolóxica das Médulas, antiga explotación aurífera de grandes dimensións e singulares formas que foi declarada Patrimonio da Humanidade.
ENLACES DE INTERESE
- Sede
Electrónica - Portal de
Transparencia - Perfil do
Contratante - O noso
Rueiro - Camiño de
Inverno - Suscríbete en
TokApp - Subvencións á
Cidadanía - Web
Turismo