Unha escena do "Anfitrión" de Plauto representado por "A Finxideira" no IES Lauro Olmo

Pasaron a esta final un total de cinco obras, tres delas na modalidade de traxedia grega/latina e comedia grega e dúas de comedia latina: a de “A Finxideira” do Barco e a do grupo “Balbo” de El Puerto de Santa María (Cádiz), así pois os dous grupos competirán polo primeiro premio, de comedia latina, que está dotado con seis mil euros para a realización dunha viaxe cultural.

Os membros do grupo teatral e o Instituto están moi ilusionados con este recoñecemento que supón, cando menos, o privilexio de representar nun teatro romano e convivir un par de días con alumnos doutros lugares, unidos no interese polas artes escénicas e a cultura clásica. A montaxe de “Anfitrión” feita por “A Finxideira”, que participou no concurso a través dun vídeo realizado polos propios rapaces, está coordinada polo profesor de Latín, Julio Parada, autor da adaptación. Da dramaturxia e da dirección artística ocúpase Pilar Alonso. O elenco está formado polos alumnos Santiago Coni Molina, Alba Díaz Urdangaray, Álvaro e Lucas Docampo Gacio, Sabela López Loureiro, Tamara Martínez Pires e Aitor Ramos Soto.

É de salientar que este “Anfitrión” foi presentado a concurso en galego e vai ser representado en Segóbriga na mesma lingua. As bases deste certame do ME, para grupos formados por alumnos/as de secundaria, inclúen todos os idiomas oficiais do Estado Español. É a primeira vez que se presenta ao concurso “A Finxideira” que vai ter que medirse co máis selecto e experimentado do teatro grecolatino, feito en España por estudantes de secundaria.