As XXVII Xornadas de Folclore comezan o martes no Barco
A XXVII edición das Xornadas de Folclore de Ourense darán comezo o martes, 10 de agosto, coas presentacións do Barco e Monforte. A partir das 22h30 o Campo da Festa do Malecón vivirá, como cada ano, un vistoso espectáculo internacional de danzas e músicas de raíz tradicional.
Coa participación das agrupacións Jembé do Senegal, Ballet Folclórico da Amazonía de Belén-Paraiba (Brasil), Ballet Folclórico Tenochtitlán de México e o Ballet Folclórico Simyonov-Tucovic de Belgrado (Serbia) O espectáculo desenvolverase ao longo de 90 minutos ofrecendo unha escolla do repertorio de cada grupo. Con máis de 160 artistas sobre os escenario as Xornadas son unha ocasión excelente para viaxar, desde as beiras do río Sil, polas culturas do mundo, e un dos eventos culturais máis concorridos no verán valdeorrés. Están organizadas pola Deputación de Ourense, a través da Escola Provincial de Danza Castro Floxo, coa colaboración do Concello do Barco.
