O luns 28 de decembro, o programa inclúe contacontos, obradoiro de debuxo e escrita e cantigas ao redor do personaxe do Apalpador para as nenas e os nenos inscritos no Campamento de Nadal, na Casa da Xuventude, das 11.00 ás 13.00 h.
Para o martes 29, ás 12.00 h está prevista a presentación na Biblioteca municipal do conto "O Apalpador", recentemente saído do prelo por iniciativa da editorial Biblos. Neste acto ha estar tamén o autor do libro, Xoán G., que se desprazará até a biblioteca para lles achegar aos meniños e meniñas do Barco a súa visión deste entrañábel personaxe, felizmente recuperado do esquecemento.

Por outra banda, o belén artesanal de Pedro Crespo, instalado na Casa de Fenosa (rúa da Estación, núm. 4) e que pode visitarse até o 10 de xaneiro, incorpora este ano como novidade a figura do Apalpador, unha achega singular na súa elaborada recreación de diferentes escenas do nacemento de Xesús.

O Apalpador é un personaxe mítico galego que baixa polo Nadal a levarlles os agasallos aos nenos e nenas. Entra de noite nos seus cuartos cando están durmidos e apálpalles a barriguiña por ver se están mantidos e déixalles, ademais dos xoguetes, unha presa de castañas.

Ten un tronco común con outras tradicións europeas e do norte de España (Olentzero vasco e Esteru ástur-cántabro) e probablemente a mesma orixe, pero que desgrazadamente en Galiza estaba practicamente esquecido. O rito da Noite do Apalpadoiro foi descrito por varios estudosos e a figura do personaxe refírese na zona da montaña lucense e, nomeadamente, no Courel. No oriente ourensán (Terra de Trives-Manzaneda, Valdeorras...) existen referencias a este personaxe aínda que, nalgúns casos, con outros nomes (Pandigueiro en Trives; Apalpadoiro ou Apalpabarrigas en Valdeorras...) e, noutros, con atribucións menos simpáticas como son as de espantar os/as nenos/as.

Neste conto (editorial Biblos Clube de Lectores, 2009), Xoán G. pretende espilo das deturpacións que ben poden responder a superposicións pouco afortunadas doutros costumes e quedarse co concepto positivo do personaxe e co seu agarimo.

+ info: www.apalpador.com e www.apalpador.net 

bpmFDG