Onte, 13 de Agosto, concluíron as obras de acondicionamento dun novo aparcadoiro municipal gratuíto no Centro do Barco. A apertura da zona de estacionamento pública foi posible grazas ao acordo alcanzado entre o Concello e os propietarios dos terreos, quen accederon á súa cesión gratuíta. Neste novo aparcadoiro caben da orde de 50 automóbiles.
A zona de estacionamento está situada entre as rúas Eloy Rodríguez Barrios e Balorca, e permitirá, ademais, mellorar as condicións de habitabilidade das rúas adxacentes: fai poucas semanas concluían os traballos de mellora da rúa Balorca, onde se ensancharon as beirarrúas e suprimiuse unha liña de aparcadoiros, e a curto prazo redactarase o proxecto de mellora da rúa España, onde tamén se mellorarán as beirarrúas, coa supresión dalgunhas prazas de estacionamento.
O Concello ten así mesmo a intención de prohibir o aparcadoiro de vehículos na zona situada tras o edificio do antigo Concello, onde recentemente, co incendio dun coche, demostrouse o perigo de que os vehículosse  sitúen no lugar.